Ave duns 16 cm, co dorso pardo, as patas negras e o peito e as partes inferiores de cor branca. Aliméntase de insectos, arañas, vermes, moluscos e crustáceos. Vive en praias areentas, pedregosas e en zonas próximas á costa. É unha ave gregaria, que forma grandes grupos. Véselle frecuentemente corricando polas praias ou en voo rasante e rápido, que non emprende ata que non se ve moi invadido. Fai a súa posta entre os meses de abril a agosto, en calquera pequena depresión poñendo 3 ovos que incuban ambos os dous pais.